Ana Sayfa > Basın açıklamaları > Daxuyanîya Roja Jinên Kedkar yên Cîhanê

Daxuyanîya Roja Jinên Kedkar yên Cîhanê

Ji Çapemenî û Raya Giştî Re

 

Bi Navê Xwedayê Rehman û Rehîm

 

Jinan, di tarîxê de ji bo gihîştina wekheviyê û bidestxistina dadê, mucadeleyên dirêj kirine û di encamê vê de jî, “8ê Adarê Roja Jinên Kedkar yên Cîhanê” li temamê dinyayê û li welatê me Kurdistanê jî tê pîrozkirin.

 

Ji kîjan coxrafyayê û ji kîjan milletî dibe bila bibe: Jin, li gelek deverên dinyayê rastî neheqiyê tên û ji hêla hêzên serdest ve bêçare û bêparastin têne hiştin.

 

Herwiha îro di serî de li Şingal û Kobanî, seranser li başûr û rojavayê Kurdistanê ji sedema aîdiyeta xwe ya olî û etnîkî jinên Kurd bi îşkence, destdirêjî û kuştina çeteyên wehşîyên DAÎŞê rûbirû dimînin. Heyf û mixabin ev zilm û zordestî û kole kirin û qetlîamên ku polîtîkayên sîstematîk yên dij mirovahîyêne li ber çavên dinyayê têne kirin.

 

Em wekî Hereketa AZADÎ, van karûbarên dij mirovahiyê yên DAÎŞê yên têne îddîa kirin ku bi navê Îslamê hatine kirin red dikin, mehkûm dikin û lanet dikin.

 

Ola heq, edalet û azadiyê Îslama Gewre, ji van kirinên dij mirovahiyê yên DAÎŞê dûr e, ne mesûl e.

 

Bêguman, ne tenê jin rastî neheqî û tehdayiyan tên. Di temamê tarîxê de, jin-mêr, kal û ciwan yanî insaniyet, pirî caran rastî zilmê û neheqiyê hatiye û biçûk hatiye xistin.

 

Lê belê jin, ji her kesî zêdetir hatine mexdûrkirin; di sîstemên feodal, modern û kapîtalîst de keda wan hatiye xwarin. Jin, bi zêhn û bedena xwe ve hatiye kolekirin û rastî her cure îstîsmar û cinayetê maye. Herwiha bûye alavekî çanda ku li ser xwarin û serfkirinê hatiye avakirin.

 

Dîn û felsefe, wekî alavekî serdestiya mêran hatine xebitandin û her rewş di eleyhê jinê de hatiye şîrovekirin. Rewş hatiye wê radeyê ku, mafên herî tebîî û fitrî jî ji bo jinê bûye sebebê nîqaşan.

 

Lê belê li gorî nêrîna dîn û felsefeyê ya rast ku ji xurafe û bîd’etan dûr e:

 

Jin hatiye teşwîqkirin û destekkirin ku  di her warî de bigihîne û pêşde bibe; ji hêla perwerdehî, îqtîsadî û îctîmaî ve jî di nav jiyanê de bimîne û cihê xwe bigire.

 

Li Kurdistanê jî, jinên me yên ku mucadeleya heq, dad û azadiyê kirine jî, di temamê tarîxê de bedelên pir giran dane. Jinên Kurd, di tarîxa Kurdistanê de mexdûriyet û mezlûmiyetên mezin kişandine û di nav rûpelên çanda me de cihê xwe yê muhîm girtine. Ji ber vê yekê, divê azadiya jinê ji qîmet û nirxên dînî, millî û malbatî cuda neyê nirxandin û fikirandin.

 

Divê li Kurdistanê jin li ser navê rizgarkirinê ji bo zeîfkirin û qelskirina nirxên dînî, exlaqî û millî nebe alet û nebe qurbanê hesabên îdeolojîk.

 

Divê jin û mêr, zorî û zehmetiyên jiyanê bi şiûrê mesûliyetê bi hev re ragirin û li ser esasê wekhevî û edaletê ji bo avakirina pêşerojeke geşbîn û aram bi hev re tevkariyê bikin.

 

Ji ber mucadeleya heq, dad, azadî û wekheviyê ne girêdayî zemanekî û coxrafyayekê ye; Jinên Kurdistanê jî, ji tecrubeyên jinên dinyayê îstîfade dikin û dixebitin ku di nav malbata însaniyetê de mesûliyeta xwe ya însanî û îslamî bicih bînin.

 

Bi vê îdrak û hişmendiyê, em “8ê Adara Roja Jinên Kedkar yên Cîhanê” li temamê jinên dinyayê, jinên bindest û bi taybetî jî jinên Kurdistanê pîroz dikin û hêvî dikin ku ev roj bibe wesîleya aştî, dad û wekheviyê.

 

08.03.2015

 

Ji bo Maf  Dad û Azadî Hereketa Îslamî Ya Kurdistanê  /

Sekreterîya Şaxa Jinan ya Hereketa AZADΠ